КОЦУР – Школяром осмей класи коцурскей Основней школи „Братство-єдинство” вчера представена Основна и штредня школа з домом школярох „Петро Кузмяк” з Руского Керестура, як можїви вибор за предлуженє штредньошколского школованя и по руски и по сербски.
Педаґоґ Иван Медєши, психолоґ и наставнїца психолоґиї Ирина Шанта, та директорка Школи и членїца Националного совиту Руснацох (НС) Гелена Пашо Павлович школяром представели Школу, наставу, интернат и провадзаци активносци у интернату.
Школяром бешедовал и предсидатель Вивершного одбору НС Желько Ковач, визначуюци стипендиї хтори Совит додзелюю найлєпшим школяром Ґимназиї по руски и безплатни интернат у першим року школованя, а на презентациї бешедовала и предсидателька Одбору за образованє НС Мелания Римар.
Презентация керестурскей Школи перше отримана школяром котри наставу слухаю на руским язику, з акцентом на руским оддзелєню Ґимназиї, а школяром котри наставу слухаю на сербским язику познєйше представени оддзелєня Ґимназиї по сербски, як и напрям Туристични техїчар у керестурскей штреднєй школи.
