КОЦУР – Стреду, 3. авґуста, у Коцуре отримана промоция проєкту „Ромска декада кнїжки”, у орґанизациї Ромскей библийскей униї и Євангелскей церкви з Коцура. Промоция отримана у Доме култури и першенствено була пошвецена представяню дзецинскей кнїжки „Мачка и пудинґ” Биляни Николич, як и стрипу „Миленова библия” Боба и Ненси Гичинґ.
Попри численей публики, на промоциї „Ромскей декади кнїжки” були и помоцнїца предсидателя Општини Вербас Ксения Бенце и Микола Шанта спред НВУ „Руске слово”.
Перша кнїжка представена прейґ видео-презентациї, а другу представели госци з Горватскей прейґ драмскей точки. Публика могла чуц и забавну и духовну музику на ромским и сербским язику, хтору виведли оркестер коцурскей євангелскей церкви и госци з Горватскей. З музичну точку представели ше и волонтере з Голандиї.
У рамикох програми у голу Дому култури була вистава малюнкох инспорованих зоз животом Ромох, вецей авторох.
Проєкт „Ромска декада кнїжки” порушани на инициятиву вецей ґрупох хтори повязани з орґанизациями и церквами ширцом Европи, а пре описменьованє и звекшанє числа читательох медзи Ромами.
Прейґ проєкту, чия промоция будзе у вецей местох у Сербиї, буду подзелєни коло 10 000 кнїжки, а у Коцуре пакети кнїжкох публика достала на виходзе зоз сали.
