КОЦУР – У Коцуре нєшка, 17. априла, у Доме култури починаю треци Днї театру и тирваю по 19. април. На манифестациї буду означени два ювилеї визначного коцурского ґлумца и режисера Дюру Макая – 40 роки його театралней творчосци, 45 роки роботи у култури и 60 роки живота.
Програма нєшка почнє з отвераньом вистави на 19 годзин, а през три днї буду приказани шейсц зняти представи хтори Дюра Макаї режирал з коцурскима аматерами.
Нєшка буду приказани представи „Франтовнїца” и „Святко и Меланка”, на ютре „Поп Чира и поп Спира” и „Мистер долар”, а на нєдзелю буду проєкциї представох „Зла жена” и „Ожалосцена фамелия”. Проєкциї представох у Доме култури у Коцуре починаю на 19,30 годзин.
Понеже манифестация нє ма финансийну потримовку, пре нєдостаток средствох на нєй того року нє будзе приказана анї єдна представа „на живо”. З Орґанизацийного одбору виражели жаль же ше Днї театру отримує у исти час кед и Драмски мемориял у Руским Керестуре, алє то прето же, пре завжатосц просторийох з програмскима активносцами, у коцурским Доме култури у тим мешацу нєт други шлєбодни термини.