КУЛА – У Кули, на шлїзкалїщу у ОШ „Иса Баїч” и далєй тирва Школка корчоляня за дзеци пред поладньом, вечаром од 16 годзин ше можу шлїзкац шицки гражданє, а вноци од 21 на ляду бавя и тренираю Гокеяшски клуб „Русин” зоз Руского Керестура.
Школка корчоляня за дзеци од наймладших по 18-рочних почала 10. януара, а инструктор Славко Пап, професор з Керестура и дакедишнї югославянски репрезентативец у биатлону (жимским спорту обегованя на скийох).
У Школки участвую коло 40-дзеци хтори орґанизовани у двох ґрупох, а вежбаю у чаше од 10-11,30 годзин. Школка безплатна як и пожичованє корчольох, нє лєм за дзеци, алє и за шицких хтори ше ходза шлїзкац.
Од пиятку, 10. януара, на тим лядовим терену почали тренирац и члени Гокеяшского клубу „Русин” з Руского Керстура хтори тиж водзи Славко Пап. По його словох, пре слабу жиму того року лєм даскельо днї могли тренирац на домашнїм терену, на Данчовей долїни, а тераз у Кули можу тренирац кажди дзень (цо компензация за його анґажованє у Школки) и источашнє и промовую Кулянцом тот жимски спорт, та и керестурски гокей хтори ма уж пейдзешатрочну традицию.
Шлїзкалїще у Кули обезпечела Општина Кула, та и безплатне хаснованє терену и корчольох, и Школки корчоляня хтору орґанизує општинска Канцелария за младих. Школка корчоляня будзе тирвац ище дас дзешец днї, а шлїзкалїще будзе отворене по 15. фебруар.
