СРИМ – На основи реаґованя Дружтва за руски язик, литературу и културу з Нового Саду и його секцийох у Бачинцох и Бикичу, виборна настава руского язика з елементами националней култури у школох у Бачинцох и Бикичу и у тим школским року будзе предлужена – дознава Рутенпрес од заступнїци Дружтва Ирини Папуґа.
После нєдавних информацийох же у школох у Бачинцох и Бикичу нє будзе настави по руски, алє ше школярох будзе превожиц до матичних школох у Шидзе, Дружтво реаґовало при компетентних институцийох за образованє, так же настава у спомнутих местох будзе предлужена.
Контактоване и з директорами основних школох „Бранко Радичевич” и „Сримски фронт” у Шидзе, та наставнїца Златица Сивч Здравич наставу по руски предлужи отримовац и у тих двох школох у Шидзе, як и у їх оддзелєньох у Бачинцох и Бикичу.
У Бачинцох перша годзина уж и отримана пияток, 30. септембра, дзе руским школяром и школскей библиотеки подаровани кнїжки, а у тим месце ше на руски язик (од першей по осму класу) кажди рок приявя од 10 до 15 школяре.
У Бикичу термин отримованя годзинох руского язика будзе нєодлуга догварени, а у тим месце наставу по руски би мали слухац пецеро школяре од першей по штварту класу.
Як Рутенпрес информує Папуґова, а спрам спознаньох од наставнїци Моники Абодї, за виучованє руского язика у Сримскей Митровици уписани 16-еро дзеци (од 1. по 8. класу) зоз штирох ОШ.