РУСКИ КЕРЕСТУР – У керестурскей парохиї вишло остатнє тогорочне число християнского мешачного часопису „Дзвони” и з найвекшей часци є пошвецене актуелним крачунским шветом.
„Дзвони” приноша и Крачунску винчованку владики Георгия, други статї з хторима ше преглїбює значенє того швета, як з пирка наших священїкох, так и других познатих духовних авторох. За наймладших читачох ту и крачунска драмска сличка „Рождество”.
Попри актуалносцох з вселенскей Церкви, у нових „Дзвонох” друковани и здогадованя на наших дакедишнїх преднякох хторим у децембру означени рочнїци, а у часопису и треце предлуженє з историї и сучасносци Каритасу, нови статї у додатку „Богословска думка”, та висти и фотоґрафиї з подїїйох у наших парохийох.
Попри крачунскей винчованки, редакторе „Дзвонох” поволую читачох на финансийну помоц, понеже дальше виходзенє „Дзвонох” озбильно загрожене.