Пече зоз грозна, шлївки, кайси, яблука, брескинї, грушки и бишалми. Зоз своєй винїци у Ердевику обезпечує грозно гамбурґ, райнски ризлиґ и племенку, з овоцнїка шлївки и яблука, а другу овоц купує.
Полни три децениї Илия Цветкович зоз Шиду пече палєнку. Роками, углавним за свойо потреби, а остатнї даскельо роки продукция палєнки му постала бизнис. Пред шейсцома роками купел казань од 200 литри вредносци 6 000 еври и од теди пече палєнку навелько, а окреме oдкеди пошол до пензиї з места вожача у Општинскей управи. Гвари же у сезони през казань прейдзе медзи 30 и 40 тони овоци. Найвецей продукує палєнку з грозна, потим зоз шлївкох, кайсох, яблукох, брескиньох, грушкох и бишалмох. Зоз своєй винїци на пол гольта у Ердевику обезпечує грозно гамбурґ, райнски ризлиґ и племенку, а з овоцнїка шлївки и яблука, а другу овоц купує.
– Окреме треба мац сцерпеня кед слово о палєнки з бишалми. Бишалму купуєм у Моровичу. Овоц перше треба добре умиц, кажди плод пререзац на поли, повиберац маґочки и аж вец ше бишалму мелє. Овоц нє варим, кед добре прероби ком, вец го печем. З 200-литрового казаню мож достац од двацец по двацец два литри палєнки, а кед у питаню бишалма, вец лєм коло осем литри. И зоз шлївкох виберам маґочки, та вец ком швидше превре. Ком голєм раз дньово премишам же би ше посцигло ровномирносц алкоголного вреня – гвари Илия Цветкович.
Палєнку пече найчастейше у Ердевику, дзе ма три гольти жеми и хижу, а тиж и у Беркасове, дзе му син Боян паноцец Сербскей православней парохиї.
На питанє кельо му треба часу же би шицко постарчел, Илия одвитує же важне добре ше орґанизовац и же аж коло 99 одсто роботи сам пороби кед пред тим шицко добре порихта, та вец нє траци час и енерґию.
Прерви у сезони печеня палєнки скоро же нєт, бо нєшка лєгко гоч хтору овоц купиц од овоцарох зоз хладзальнї и вец випродуковац палєнку.
Наш собешеднїк додава и же зоз своїм казаньом услужно пече палєнку за других дробних продуковательох. Вони ком приноша до ньго, а кед треба, вон и превожи ком до свойого казаня. Значне количество палєнки треба попредац, а и у тим тиж треба буц досц схопни.
– Палєнку предавам на пияцох у Беоґрадзе, Врнячкей Банї, Бачкей Паланки, а бул сом и у Руским Керестуре. Часто вожим жени зоз здруженьох женох з општини Шид на рижни манифестациї, та вше зоз собу ношим и свою палєнку хтору викладам на окремним штанду. Купци найвецей купую палєнку зоз шлївки, а хто ма вецей пенєжи купує палєнку з бишалми и з кайси хтору предавам по 1 200 динари. Прешли рок бул вигодни, плоди були квалитетнєйши, бо було надосц слунка, алє овоц менєй зродзела. Дньово печем по 10, 11 казанї, а печенє палєнки з єдного казаня трива два годзини – гвари Илия Цветкович.
ПРАВИ И ЛИКЕРИ
До роботи и помоци ше дала и Илийова супруга Лепосава. Вона задлужена за продукцию ликерох. У понукнуцу позната ореховача, потим ликер з малини, чернїци и кайси, а продукує и компот и маджуни. Тиж понука и домашнї виски зоз шлївки хтори одстал 20 роки у старим гордове.
КРАСНА И АМБАЛАЖА
Илия добре похопел же окрем самого квалитета палєнкох, значна и амабалажа у хторей ше предава.
– Наручуєм склєняни фляши зоз Фабрики скла у Панчеве. Тиж важне и яку етикету положице на фляшу и яки дизайн ма – гвари Илия.
