РУСКИ КЕРЕСТУР – По вчера законченим першим уписним терминє, 62-ойо школяре уписани до трох оддзелєньох Штреднєй школи „Петро Кузмяк” у Руским Керестуре.
До першей класи оддзелєня Ґимназиї з руским наставним язиком уписани 23-ойо школяре, и давно нє було таке вельке число школярох у тим оддзелєню. Окрем єдного школяра з Нового Саду, шицки з Руского Керестура.
До оддзелєня Ґимназиї зоз сербским наставним язиком уписани 16 школяре, а крем двоїх, шицким то було перше жаданє. До оддзелєня Туристични технїчар уписали ше 23-ойо з 25, кельо були розподзелєни.
За остатнї два днї до Дому школярох уписани 25-еро школяре, векшином першей класи штреднєй школи, а упис до интернату, хтори понука 80 места, тирва по 14. юлий.
После першого уписного кругу у керестурскей Школи єст ище 7 шлєбодни места у руским оддзелєню Ґимназиї, 14 у сербским и 5 у напряме Туристични технїчар, а други уписни термин 9. юлия.