СУБОТИЦА – На нєдзелю, 31. октобра, кед пада и швето Христа Царя, у нашей суботицкей парохиї будзе преславени Кирбай.
Кирбайска Служба Божа будзе у францисканскей церкви св. Михаїла, у каплїци Чарней Мариї на 16,30 годзин. Службу будзе предводзиц новоменовани парох керестурски и суботицки о. Владислав Варґа, а сослужиц буду коцурски парох и декан о. Владислав Рац и старовербаски парох о. Алексий Гудак.
З нагоди Кирбая до суботицкей парохиї будзе принєшена и копия икони Мариї Водицовей хтора тераз пребува у церкви у Старим Вербаше. По Служби за вирних плановане и друженє.
Копия икони Мариї Водицовей по розпорядку на нєдзелю, 7. новембра будзе однєшена до нашей парохиї св. Луки до Бачинцох, а од 21. новембра будзе пребувац у парохиї св. Петра и Павла у Новим Садзе, цо вирним будзе нагода модлїц ше за заступнїцтво до Мариї Водицовей.
