РУСКИ КЕРЕСТУР – И попри нагаднутого векшого зменшаня средствох од главного финансиєра – АП Войводини, Руски народни театер (РНТ) „Петро Ризнич Дядя” и того року пририхта єдну представу. Будзе то новонаписани текст „Зазбероваче труплох” Звонимира Павловича, з чим ше РНТ уключи до тогорочного означованя 130-рочнїци народзеня Гавриїла Костельника, котри бул автор и першого драмского тексту на нашим язику – одлучене на схадзки Управного одбору (УО) РНТ, хтора у Руским Керестуре отримана всоботу, 30. януара.
Тот обсяжнєйши проєкт на сцену заєднїцки поставя Михайло Зазуляк и Славко Орос, так же наш национални театер и того року будзе мац два нови представи, понеже представа „Цо видзела послуга” Джона Ортона, у режиї Владимира Надя Ачима уж пририхтана. Пре нєпредвидзени околносци премиєра, хтора мала буц 31. януара, одложена до дальшого.
На схадзки прилапени и звити о роботи и финансийох Театру, у хторих визначене же 2015. року РНТ аж зоз штирома представами зазначел вецей госцованя и виводзеня як рок пред тим, як и же РНТ финансийни рок закончел позитивно, без утратох, дзекуюци и финансийней потримовки сновательови Театру – Националному совиту (НС) Руснацох.
Векше число госцованьох будзе главне опредзелєнє и у тим року, а аж после спознаня о висини средствох од орґанох Покраїни и НС, того року перши раз можебуц и од Општини Кула, будзе принєшени финансийни план РНТ за 2016. рок, заключене на схадзки УО.
Бешедоване и о предлужованю твореня копродукцийних представох з драмскима ансамблами по наших местох, та заключене же витворенє шлїдуюцого такого проєкту 2017. року будзе понукнуте новосадскому Рускому културному центру.