ҐОСПОДЇНЦИ – По програми з нагоди нашого швета у Дюрдьове, Националне швето Руснацох исти дзень, 17. януара, означене и у Ґосподїнцох. Преслава у Ґосподїнцох орґанизована першираз, дзекуюци добрей координациї Подручней канцелариї Националного совиту (НС) Руснацох у Дюрдьове, хторей припадаю и Ґосподїнци, алє и гражданом Ґосподїнцох, котри помогли у орґанизациї и у красним чишлє пришли означиц швето. На означованю швета у Ґосподїнцох присуствовали и велї Дюрдьовчанє.
Шветочносц отримана на 14 годзин у будинку Месней заєднїци, а и ту почала з гимну Републики Сербиї и шветочну шпиванку Руснацох у Сербиї. У мено домашнїх и Дружтва за Руски язик, литературу и културу, присутних привитали Владимир Салонски и представитель Подручней канцелариї НС Руснацох у Дюрдьове Мирон Сабадош. О Руснацох и функциї НС бешедовал предсидатель його Вивершного одбору Желько Ковач, а винчованку предсидателя Општини Жабель Чедомира Божича Ґосподїнчаном пренєсол Мирон Сабадош.
На пригодней програми з нагоди швета участвовали поетове з Дюрдьова Владимир Кочиш и Яким Чапко, док реферат о доселєню Руснацох на тоти простори и терашнїм живоце пречитал Тарас Чапко.
На означованю швета у Ґосподїнцох присуствовали ґосподїнски грекокатолїцки парох о. Михал Холошняй, покраїнски послнїк Тихомир Нежич, предсидатель Совиту Месней заєднїци (МЗ) Ґосподїнци Цвийо Проле, предсидателька совиту МЗ Дюрдьов Леона Виславски и предсидатель КУД „Тарас Шевченко” з Дюрдьова Микола Кухар. После програми пририхтани коктел и друженє.
