ВАЛЄВО/НОВИ САД – Фолклорни ансамбл ветеранох Руского културного центру (РКЦ) з Нового Саду освоєл Златни погар, як найлєпши ансамбл у катеґориї ветеранох на 14. Соборе фолклорних ансамблох Сербиї и дияспори „Златна бочкора” („Златни опанак”) у Валєве, на хторим участвую найлєпши танєчни ансамбли з цалей Сербиї и иножемства. Фестивал тирва вецей днї, а на нїм участвую рижни ансамбли хтори чуваю народни скарб, як му гутори и полна назва – Собор фолклорних ансамблох, ґрупох, оркестрох, инструменталистох и демонстраторох обичайох Сербиї.
Новосадянє, под руководительством хореоґрафа Миломира Шайтоша, у валєвским Доме култури на Фестивалє наступели пияток, 1. априла, а змагали ше з хореоґрафию „Руски танци Бачкей и Сриму”, у конкуренциї седем танєчних ансамблох-ветеранох. Як и фахова комисия, и публика барз добре прияла нашо танци и ветеранох РКЦ наградзела з длуготирвацим аплаузом.
За успишни наступ и указани уметнїцки уровень, танєчни ансамбл ветеранох РКЦ достал Златни погар, а на Фестивалє у Валєве ансамбл участвовал на поволанку орґанизатора – Дружтва за очуванє сербского фолклору „Ґрадац” и Городу Валєво.
Як за Рутенпрес гварела директорка РКЦ Наташа Макаї Мудрох, поволанка на Фестивал резултат и членства у Асоцияциї културно-уметнїцких дружтвох Сербиї (основаней у фебруаре того року), а одход до Валєва витворени дзекуюци єдному донаторови, котрому РКЦ на тим дзекує и прейґ медийох.
