ВЕРБАС – У вербаским Готелу „Бачка” всоботу и вчера отримани семинар за наших просвитних роботнїкох з назву „Як звекшац ефикасносц и мотивацию за роботу и ученє – рационално-емоцийни приступ”, хтори ше находзи у Каталоґу Педаґоґийного заводу Войводини за тот школски рок и ноши 24 боди.
Семинар акредитовани за 30 учашнїкох, а слухали го виховательки у предшколских оддзелєньох на руским язику и учителє и наставнїки з основних школох у Руским Керестуре, Коцуре, Дюрдьове, Новим Садзе, Шидзе, Сримскей Митровици, Савиним Селу, Вербаше, Кули и Новим Орахове.
Теми семинару були увод до теорийного приступу рационално-емоцийно-бихейвиоралней психотерапиї, упознаванє з „АБЦ” моделом людского реаґованя, гришками у думаню, асертивносцу и комуникацийнима схопносцами, з блокированьом мотивациї, професийним стресом и другима хасновитима темами.
Реализаторки и авторки семинару психолоґинї Милена Опарница и Миряна Тркуля, а з тей нагоди Милена Опарница визначела же семинар обдумани же би з наставнїцку популацию, як нєклїнїчну, поробел обласц хтора хасновита и за зменшанє стресу у тей професиї.
Семинар орґанизовал Национални совит Руснацох, а предсидателька його Одбору за образованє Мелания Римар визначела же семинари нашим виховательком, наставнїком, учительом, професором барз потребни пре роботу, наменєни су наставнїком хтори робя на руским язику (порядно и факултативно), Одбор за образованє оможлївює змесценє и коштанє семинару, а тему вибрали його нащивителє.
Упечатки учашнїкох семинару позитивни, нащивителє були задовольни и визначели же бул барз интересантни, бо теми прилаплїви и применлїви у каждодньових ситуацийох у просвитней роботи.