Нєдавно бул розписани Подобови конкурс за першокласнїкох зоз цалого Заходнобачкого округу на тему „Квиток за мою маму”. На конкурс кажда школа могла послац роботи, алє зоз каждого оддзелєня лєм по три рисунки. Так и учительки першей класи у ОШ „Петро Кузмяк” поробели, та з обидвох оддзелєньох послали по три роботи. Єдна з нїх була и Хеленкова.

Кед зме ше стретли зоз ню виприповедала нам як ше єй удало нарисовац таки рисунок.

–Га, перше сом нє знала цо бим могла нарисовац, алє вец ми мама дала идею же най нарисуєм квеца. Алє я перше нарисовала єдну твар на штредку, а вец доокола тоти квеца. Мам єдну вифарбйованку з квецами, та сом вец там видзела даєдни и прерисовала сом их. Вец сом вжала рижни фарби и нарисовала тот рисунок – бешедує Хеленка.

–Тот рисунок, „Квиток за мою маму”, ми нє було чежко нарисовац, бо ме рисовац научела моя шестринїца. А ми уж и скорей за Осми марец свашта рисовали, правели маґнети, мали жвератка… То фино кед можеме мамом и учительком дацо подаровац за Осми марец – гвари вона.

Кед пошла до Зомбора прияц награду, 6. марца, барз ше обрадовала же видзела тельо дзеци. Даєдни грали, даєдни шпивали, алє змаганє було и за младши дзеци, цо украшовали торти. Гвари же єй було барз фино.

Нє лєм рисованє, алє и рахованє

Хеленка бива у Кули, алє ходзи до першей класи у Руским Керестуре, и баржей ше єй пачи у школи, як у оводи. Шицки ше у оддзелєню крашнє складаю, и хлапци и дзивчата, и нїґда им нє допито. У учальнї маю направени семафор справованя, та ше спрам нього и справую, и зоз фарбами означую свойо поступки. Мож повесц же су наисце одлични. Нїхто нє ма коло свойого мена червени знак.

Попри обовязкох у школи, хтори вше на час сполнює, Хеленка ходзи на кошарку и английски язик. Гоч на змаганя у кошарки ище нє ходзи єй возрост, люби тренирац и цильовац до кошу. Гвари же раз дала аж 102 поени.

Треба спомнуц и тото же кед мала пейц роки, та освоєла стриберну медалю на реґионалним змаганю у менталней аритметики. Одмалючка любела числа, та и тераз так остало. Гвари же барз люби математику, алє и шицки други предмети єй добре иду.

Награда за рисунок„Квиток за мою маму” єй уручена 6. марца у Зомборе на шветочносци котру пририхтал орґанизатор Конкурсу – Асоцияция женох Републики Сербиї, окружни, општински и городски одбор Зомбор.

Наградзени и похвалєни роботи буду виложени у Доме школярох Зомбор по 20. марец.