Мено и презвиско: Наташа Гайдук

Як ше вола ваша професия?

Дохтор стоматолоґиї

Зоз чим ше точно занїмаце?

Зубар препатра зуби, учи пациєнтох правилно отримовац гиґиєну устох и зубох, оправя, лїчи и цага зуби, прави протези и коруни кед дакому хибя даєдни зуби.

Яку школу треба закончиц же би дахто могол робиц як зубар?

Же биш бул зубар, после штреднєй школи треба закончиц стоматолоґийни факултет.

Яки ше там предмети учи?

На початку ше учи предмети як цо то биолоґия, хемия, физика, анґлийски язик, а потим ше достава медицински предмети як цо то анатомия, физиолоґия, хирурґия, интерна медицина… Остатнї два роки учи ше лєм стоматолоґийни предмети и єст надосц вежби на хторих ше роби зоз пациєнтами.

Цо шицко треба знац кед сцеш буц добри зубар?

Же биш бул добри зубар мушиш любиц таку роботу, провадзиц шицко нове цо ше зявює у тей обласци.

Одвше сце сцели робиц праве тоту роботу?

Гей, одвше сом сцела буц зубарка.

Цо найкрасше у тей роботи?

У тей роботи найкрасше кед можеш помогнуц же би людзе мали здрави и красни зуби.

А цо найчежше?

Найчежше кед пациєнти нє сотрудзую, бо вец анї я нє можем поробиц свою роботу так як би требало.

Яка особа треба же би була же би була добри зубар?

Же биш бул добри зубар мушиш ше досц учиц, любиц свою роботу, мац надосц сцерпеня.

Мушице ношиц даяки окремни шмати на роботу?

У ординациї ношим окремни шмати – блузну и панталони.

Цо зубаре хасную за роботу?

За роботу у ординациї потребна єдна тацночка на хторей ше находза пейц нєобходни инструменти, а за брушенє зубох ше хаснує турбина и коленяк.

Цо бисце поручела дзецом хтори сцу постац зубаре док вирошню?

Дзеци хтори сцу буц зубаре най ше уча и най буду витирвали.