ВЕРБАС – Нєшка, 17. януара, у Вербаше будзе Централна перслава Националного швета Руснацох у Сербиї.
Програма означованя швета нєшка почнє на 10 г. зоз змаганьом у столним тенису у рамикох Спортских бавискох „Яша Баков”, на 13 г. буду поставени етно-столи, а на 14,30 вистава подобових роботох Кристини Ґшвенґ з Вербасу. Спомнути програми буду у просторийох КПД „Карпати”.
У Шветочней сали Ґимназиї „Жарко Зренянин” на 15,30 г. будзе промоция кнїжки „Руснаци у Вербаше” и специялного числа „Руского слова” з нагоди швета; на 17 г. у нашей церкви у Старим Вербаше будзе Архиєрейска Служба Божа; на 19 г. у Ґалериї Културного центру будзе отворена вистава „Карпатски мит” Владу Нярадия з Вербасу, а на 20 г. у кино-сали „Югославия” будзе Шветочна академия з нагоди Националного швета Руснацох у Сербиї.
На академиї участвую хор, ґрупа шпивачох и солисти з Вербасу, шпиваче и рецитаторе з других наших местох, а провадзи их Национални оркестер Руснацох, под руководительством Мирона Сивча.
На Централну преславу Националного швета Руснацох поволани визначни госци з орґанох Републики Сербиї, Покраїни Войводини, амабасадох державох у котрих жию Руснаци у швеце, чолнїки локалних самоуправох, представителє других националних совитох меншинох у Сербиї, представителє наших и других институцийох, установох, орґанизацийох и здруженьох.
Централну преславу Националного швета Руснацох у Сербиї орґанизую Завод за културу войводянских Руснацох и окремни Орґанизацийни одбор за Централну шветочносц, у хторим представителє спомнутого Заводу, Националного совиту Руснацох, КПД „Карпати” и Општини Вербас.