Час преходзи, aлє рибарска страсц нє

автор М. АФИЧ
1.6k Опатрене

Єден з тих цо оддихнул кед нєдавно отримана рочна Скупштина Здруженя рибарох „Коляк” з Руского Керестура вшелїяк и Любомир Чапко, його член з вецей як 40-рочним стажом, а з єднаку залюбеносцу и страсцу ґу тому спорту як и дараз давно. Було бешеди же чи Здруженє будзе загашене, алє вибрани нови предсидатель, и робота ше предлужи.

Наш собешеднїк о тим отворено бешедує:

– Барз ми мило же ше предлужи робиц, бо ми, старши, треба же бизме дацо хасновите зохабели младшим, а на нїх як гваря „швет остава”. Рибаре любя и лапац риби, и беґель любя, и цалу його природу, та ше о тим и стараю. Вельо раз нє можу зробиц тото цо би сцели, но Здруженє заш лєм гласнєйше як сам чловек.

Так почина бешеду Любомир Чапко хтори свой живот без рибарскей рекреациї анї задумац нє може. На свойо 65 роки скоро кажди дзень є на беґелю, а як гвари, през жиму ходзи частейше. До того ше залюбел ище як хлапчик.

ЧАПКОВА РИБАРСКА ЛОЗА

Capko z ribu– Унук сом галаса Мафтея Чапкового. Вон бул познати професийни  рибар на старим беґелю велї роки пред тим як викопани беґель Дунай–Тиса–Дунай. Закуповал єдну часц беґелю и там лапал риби вєдно з бачиком Сеґешом и Рускайом. То було ище пред Другу шветову войну.

– Мой оцец Мафтей одмалючка коло свойого оца тиж барз полюбел лапац риби, та цали живот бул активни рибар попри свойого пекарского ремесла – памета Любомир.

Фамелия пекара Мафтея була богата зоз дзецми, а Любомир други по шоре од шесцерих дзецох, та живот мушел буц добре орґанизовани у шицким, як у роботи, так и у лапаню рибох. А чули зме од старших же такого рибара як пекар Мафтей – нє було.

– Ище док зме були дзеци оцец видавал карти шицким рибаром у валалє, та и нам вше даєдну удзелєл. З радосцу зме одходзели лапац на над, цо мой дїдо вше мал, а вец зме риби лапали на бамбусох аж потамаль  док нє пришли машинки. Кед зме закончели основну школу, оцец отворел пекарню, та ме вжал за шеґерта. Кед зме вєдно робели, вон вше два раз до тижня, додня док швитало, охабял роботу одходзел лапац риби, а я оставал докончиц роботу. Два раз и я ишол на беґель. Теди змеи хлєб пекли скорей, же би зме були готови до пол штвартей рано. Єден ходзел под Косанчич, а други до Филїпова. Я кармел ту два места, а вон там други два места же би було порихтане, та кеди ше дзе лєпше укаже  – приповеда Любомир о рибареню зоз своїм оцом.

Шейдзешатих рокох прешлого вику у Керестуре, окрем на Вельким шоре, нє було трофазней струї, та так анї на Маковским, дзе Чапково мали пекарню у своїм доме. Прето шицко з руку робели. Така робота нє була лєгка,  а окреме же ше и воду цагало зоз студнї на Капущаним… Прето ше чудуєме у розгварки з Любомиром, чи после нєлєгкей ноцней роботи,  було чежко на бициґли пойсц дзешец километри на беґель. Любомир одмахує з главу, же анї кус, и то роками.

– Рахуєм же сом активно почал лапац риби кед сом пришол з войска  пред вецей як штирома децениями. Найволєл сом лапац прейґ драги од Бикийового салаша, аж под Пиньвиц. Мушел сом пойсц перше на Косанчич, и два километри далєй на мост, а док нє було моста, на скели сом преходзел на други бок. Ишло ше и около, на лалицки мост, на гевтот бок на лїво… То було узвичаєне. Знал сом же ми треба три ферталї годзини дойсц,  та сом так и плановал свой час – гвари наш собешеднїк.

24 Capko-sulji - Copy (2)

ЄСТ ЦОШКА У ТИМ ЛАПАНЮ

Кед таке чує, чловек ше опита самому себе, цо то за страсц кед так гонї на таку пожертвовносц и усиловносц. То вшелїяк любов ґу природи, беґелю, води, и тому сцерпезлївому шедзеню на побрежю кед стрежеш з циґоньом опрез себе ужераюци ше чи ше дуґов нє покива. О тим Чапко гвари:

– Нє знам анї сам, цошка єст у тим таке цо обераце, и почнє це цагац нательо же мушиш ходзиц. Так сом и велїх пайташох волал, „гибай лєм даскельо раз, обереш ше од того та це далєй само будзе цагац лапац”. На беґелю ше одпочиваш, пущиш розум на пашу, и ище коло того  лапиш рибу. А кед пойдзем наяр, кед шицко доокола почнє квитнуц, нєт красше. Вец приду турґунї,  та себе наоберам,  а кед о два роки  видзим  як коло  мнє з маґочкох посходзели нови турґунї и тарки…  З єдним словом, барз крашнє у природи буц. Анї ми нє бриґа гоч  и нє лапим рибу, бо дакеди пойдзем та ше добре одпочинєм, а то цалком досц  – змирено приповеда Любомир.

Capko-ribare 002Нє мож нє спомнуц и тото же як ше природа пременєла у остатнїх 50 рокох, яке шицко доокола, та и беґель хтори часто заґадзени. Риба нє раз поздиха од водох випущених з фабрикох… И наш собешеднїк памета же скорей було вельо вецей риби, та лєгчейше було и налапац, и гвари и же єст якаш тайна и у тим же риби и нєшка єст на тим истим месце дзе єй було и пред 50 роками.

 НАЙВОЛЄЛИ ЛАПАЦ ПОТЬКУ

Пекар Мафтей найволєл лапац потьку, як гвари його син Любо, теди то було популарне. А и вон сам нашлїдзел тоту любов.

– Потьку найволїм лапац и вецей як 25 роки сом скоро нїч инше анї нє лапал. Найвекша потька хтору сом лапел мала 17 кили и 80 деки, а харчи сом лапел до 10 кили. Но, мушим повесц же оцец вше вецей лапел од нас, гоч зме го як пробовали здогонїц, вше даскельо риби вецей лапел. Любим барз и єсц риби, ту нє виберам, а поготов смачни терпеши. А барз их любим сам приготовиц – толкує Чапко.

И УНУКИ УЧИ ЛЮБИЦ ПРИРОДУ

Любомир нєшка чека заслужену пензию, док у марцу того року наполнї 65 роки. А остатнї 18 у роботним вику препровадзел на роботи у кулским рибалове у подприємстве „Дюро Струґар”, дзе ше „случайно” нашол.

– Робел сом у пекарнї, а кед на рибалове нє бул хто чисциц мрежи, поволали ме и там робиц. И руководзаци знали за мою страсц, а у  кулскей пекарнї нє раз бул смачни фриштик – пражена риба. Робел сом дакус и на керестурским рибалове, та и то ми була мила робота.

На питанє докля планує буц активни спортски рибар, Любомир гвари же будзе ходзиц лапац доґод лєм годзен. А свою страсц помали преноши и на двох унукох Мирка и Матея. Старши Мирко и його шестричка Ана Мария з дїдом часто одходза на шпацир по беґелю. Учи их дїдо любиц природу, бо и вон дума же то нєшка дзецом барз хиби.

– Шпациранє по беґелю обовязне. На бициґлох пойдземе покля мож, а вец пешо по „широке”. Там и назад маме 12 километри. Пообиходзиме шицко. Миркови барз интересантни вояцки мост, Ана зидзе долу бо люби чернїци, а там ставаме и пре вербу. Одрежем ю, та им направим пищалки… Най и вони дакус уживаю.

24 Capko-ribare 006 - Copy (2)

КЕД Є НЄ НА БЕҐЕЛЮ, ВЕЦ Є ПРИ КОШАРКОХ

– Вжиме скоро кажди дзень ходзим лапац зоз „варалицу”. А кед сом нє на беґелю, правим койцо з вербового пруца, бо я рибар, а з рибарами идзе и вербово пруце. Палє ниа, ту фляша чека буц оплєцена, а оплєтам рижни кошарики, коршовики… И  мой дїдо тото робел, алє я ше од других научел. Верби находзим коло Шимкового, бо и там ходзим лапац, и зоз старих вербох наштригам пруце, гоч вони помали и дослугую, а я садзим и нови. Скорей, док сом нє плєтол з пруца, та бим виплєтол, те черенєц и мередов, то таке – за себе було добре. Мам иглїчки, а и прастарей цверни цо ю оцец ище набавел у Заґребу. А тото ме научел дїдо Мафтей – памета Любомир Чапко.

ПОВЯЗАНИ ТЕКСТИ