Часопис за науку, литературу, културу и уметносц „Шветлосц” виходзи од 1952. року (прерва у виходзеню од 1955-1966. року) и єдина є публикация тей файти на руским язику у Войводини и Сербиї.
Зоз своїм обсягом, вецей як 50 рочнїки зоз по 600-1000 боками, часопис вираз нє лєм язичней и интелектуалней креативносци рускей заєднїци у Сербиї, алє и вираз прешлосци и терашньосци Руснацох/Русинох у Стреднєй Европи.
„Шветлосц” главни креатор и информатор о културних и литературних збуваньох при Руснацох на тих просторох и пo нєшка наша найугляднєйша и на найвисшим интeлeктуалним и твoрчим урoвню периодична публикация.
Зоз значним числом сотруднїкох, як старших так и младших, часопис децениями отворени за шицки ґенерациї и шицки файти творчосци котри од хасну за културни розвой рускей националней заєднїци.
Сотруднїки у часопису руски писателє и прекладателє, а концепция му така же пестує шицки файти литературних жанрох, информує руского читача нє лєм о тим цо ше збува у рускей литератури, алє и у сербскей, и литературох з других язичних подручох нашого окруженя.
Окрем сотруднїкох з нашей жеми, у часопису нєпреривно сотрудзую и авторе з иножемства, познати фаховци за язик и историю Руснацох, цо представя значни крочай у медзинародней афирмациї и часописа и нашей култури.
Часопис виходзи квартално (штири числа до рока), у обсягу од 8-10 табаки по числу.
Микола М. Цап,
одвичательни редактор часописа „Шветлосц”