БЕОҐРАД – Вчера, 5. юния, бул Шветови дзень защити животного штредку, хтори означени у вецей як 100 жемох, а означує ше го пре зєдинєнє людзох у дїлованю на обезпечованю чистейшей, желєншей и шветлєйшей будучносци за себе и будуци ґенерациї. Тот дзень у Сербиї будзе означени нєшка з рижнима активносцами.
Шветови дзень защити животного штредку перши раз означени 1972. року, а и прейґ нього Зєдинєни нациї стимулую подзвигованє ґлобалней свидомосци о значеню животного штредку.
З нагоди Дня защити животного штредку, министерка польопривреди и защити животного штредку Снежана Боґосавлєвич Бошкович гварела же у наступним периодзе, кед ше вихаснує шицки потенцияли у обласци желєней економиї и обновююцих жридлох енерґиї, вельке число людзох годно достац роботу у управяню з одпадом, туризме и польопривредней продукциї.
Министерка наглашела же би праве желєна економия мала мац ключне место у розвою швета, а здогадла и же остатнї час у обласци защити животного штредку направени вельки крочаї напредок, окреме кед слово о законскей реґулативи.
Здогадла и же за Сербию єдно з вельких виволаньох будзе отверанє Поглавя 27, хторе ше одноши на еколоґию.