РУСКИ КЕРЕСТУР – У рамикох тогорочней Културней манифестациї „Костельникова єшень” вчера вечар у Руским Керестуре отримани концерт Суботицкого тамбурового оркестру, а концерт бул попреплєтани з интерпретованьом нєобявених творох Гавриїла Костельника.
Барз добри Суботицки тамбурови оркестер, з хторим дириґовала Марияна Марки, у пейцох блокох програми виведол коло 10 музични мелодиї з класичней музики, як цо то увертира за оперу Жоржа Бизета „Кармен”, „Хор циґанох” з опери Дюзепа Вердия „Трубадур”, „Хор Єврейох” з Вердийовей опери „Набуко” и други.
Коло 30 музичаре направели шветочну атмосферу у Велькей сали Дому култури и чкода же нє було вецей публики. Кажду музичну и рецитаторску точку патраче наградзели з наисце моцним аплаузом, цо указує же класична музика и писана творчосц ма свою публику на нашей сцени.
Костельниково твори интерпретовали Михайло Зазуляк, Александер Мудри, Андрея Колєсар и Мирослав Малацко, а котри у исти час мали и улоги водительох, понеже наявйовали музични точки хтори шлїдзели.
На програми представени виривки з есейох Гавриїла Костельника з кнїжки „Квити на пристолє”, хтори Костельник написал пред шмерцу, а длуго були скрити од явносци у архивох дакедишнього Совєтского союзу. Доступни постали аж после преглашеня нєзависносци України, а позберал их священїк Олег Гирник, котри их потим обявел у кнїжки „Ultra posse” у Ужгородзе.
Костельник свойо глїбоки роздумованя насампредз о природи, та Богови и чловекови и їх медзисобних вязох преточел до есейох хтори публика вчера мала нагоду першираз послухац. Презентованє творох у исти час була и наява за штварти том вибраних творох Гавриїла Костельника, дзе буду його есеї и критики, хтори пририхтує Новинско-видавательна установа „Руске слово”, у сотруднїцтве зоз Заводом за културу войводянских Руснацох, а у прекладзе др Янка Рамача и Михала Рамача.
