РУСКИ КЕРЕСТУР – Националне швето Руснацох вчера означене и у керестурских образовних институцийох – у Основней и штреднєй школи „Петро Кузмяк” и керестурским оддзелєню „Цицибан” ПУ „Бамби”.
На будинку Школи з тей нагоди виложена национална застава, як и на паноу у школским голу, дзе потим повикладани и роботи дзецох з тему Националного швета, хтори виробели школяре нїзших класох ОШ.
У шицких оддзелєньох од пиятей по осму класу Основней, як и у шицих класох Штреднєй школи швето означене на першей годзини. Вшадзи пречитани и пригодни текст по руски, а у сербских оддзелєньох Штреднєй школи по сербски, и того року бул о толкованю символики застави Руснацох у Сербиї.
Националне швето Руснацох традицийно означене и у керестурскей дзецинскей заградки, дзе тей тематики пошвецени аж два днї.
У шицких возросних ґрупох о тей теми бешедоване з рижних бокох, а найвецей през стародавни бависка. Предшколски дзеци були поопатрац национални застави виложени на валаских институцийох, як и музейну збирку у Замку.
