ШИД – З нагоди „Дзецинского тижня”, предсидатель општини Шид Предраґ Вукович вчера приял представительох школярских парламентох з основних и штреднїх школох у општини, як и намладших з Предшколскей установи „Єлица Станивукович-Шиля”.
Предсидатель привитал школярох и їх наставнїкох и дзецом пожадал лєпшу будучносц, же би закончели факултети и достали роботу.
Школяре поставяли питаня предсидательови – же як то буц политичар и предсидатель општини, цо любел читац кед бул школяр, алє давали и предкладаня о тим цо поробиц же би школи були ушоренши, же хибя терени за бавенє дзецох, о материялней помоци Општини добрим школяром и подобне, а наймладши и рецитовали и шпивали.
Предсидатель гварел же нє дава празни обецунки и же предкладаня школярох буду розпатрени и витворени, спрам срдствох хтори на розполаганю у општинским буджету.
Тиж им обецал же до початку жимского розпусту у Шидзе достаню шлїзкалище, на площи коло Културно-образовного центру.