СУБОТИЦА – У Городскей читальнї у Суботици на ютре будзе традицийна Културна манифестация „Яр Мафтея Виная”, хтору орґанизує Дружтво Руснацох у Суботици.
Манифестация дополадня почнє з кладзеньом квеца на гроб Мафтея Виная, а на вечар, на 19 г. будзе културно-уметнїцка програма, хтора того року пошвецена нашим младим автором.
На Манифестациї „Яр Мафтея Виная” буду представени фотографиї Марияни Павловичовей з Руского Керестура, редакторка Мая Зазуляк представи часопис МАК, а у присустве авторох будзе представена и найновша двокнїжка поезиї у виданю МАК-у „Чаривни нїтки” Цецилиї Надь з Керестура и „З молу до дуру” Михаила Рамача з Дюрдьова. На вечаршей програми зоз свою сучасну прозу участвує и Яким Винаї з Керестура, сотруднїк МАК-у.
У музичней часци програми наступя Анамария Колошняї, котра на школованю у Суботици, и Златко Русковски, обидвойо з Руского Керестура.
„Яр Мафтея Виная” у Календаре репрезентативних манифестацийох Националного совиту Руснацох.