РУСКИ КЕРЕСТУР – Вчера, на шветочним випровадзаню малих матурантох, за школяра ґенерациї преглашена Тереза Будински, школярка осмого-а оддзелєня. За найуспишнєйшу школярку у осмим-б оддзелєню преглашена Мартина Афич.
Додзелєни и два Вуково дипломи хтори, попри школярки ґенерациї Будинсковей, достал и Иван Чизмар з осмого-а оддзелєня, як и дипломи за одлични успих. У спомнутим оддзелєню одлични школяре ище Иґор Маньош, Екатарина Путник и Андрей Роман.
У осмим-б оддзелєню, попри Афичовей, дипломи за одлични успих достали Филип Баран, Кристина Катона, Деян Дюрчянски, Северина Гарди, Алексей Надь, Инес Санкович, Мария Славка Мудри, Даяна Рац, Иґор Варґа и Матей Саянкович.
Велї зоз спомнутих школярох достали и окремни дипломи за освоєни места на рижних змаганьох, а як поведзене на програми, велї школяре од своїх наставнїкох познєйше достаню и похвали за окремне закладанє з поєдинєчних предметох.
Школа „Петро Кузмяк” ище скорей вибрала и школяра ґенерациї медзи матурантами Штреднєй школи, а то школярка штвартого-2 оддзелєня Ґимназиї Соня Кнежевич з Кули, а припознанє єй будзе уручене на шветочним випровадзаню матурантох.
