КАМЙОНКА – Под патронатом предсидателя Влади Словацкей Републики (СР) Роберта Фица, 30. и 31. мая у Камйонки Старолюбовнянского округу отримани 50. Фестивал фолклору Русинох¬Українцох Словацкей, хтори пририхтали Союз Русинох-Українцох СР (СРУСР), валал Камйонка, Пряшовски самоуправни край и Любовнянски центер култури у Старей Любовнї.
На отвераню манифестациї, предсидатель Централней ради СРУСР Петро Сокол пречитал поздравни писма, хтори орґанизатором и учашнїком Фестивалу послали министер вонкашнїх дїлох України Павло Клїмкин и Позарядови и ополноважени амбасадор України у СР Олег Гаваши.
У змагательней часци „Голосе, голосе“ участвовали 17 шпивацки ґрупи з того краю, а по одлуки жирия, у катеґориї дзецинских и дзивоцких шпивацких ґрупох побиднїк шпивацка ґрупа „Вородай“ з Велького Липнику, док у конкуренциї женских и хлопских шпивацких ґрупох побиднїки женска шпивацка ґрупа „Барвинок“ з Камйонки и хлопска шпивацка ґрупа „Кичара” зоз Снїни.
У соботовей програми „Госц до дому, Бог до дому“, хтора пре диждж нє отримана у цалосци, алє заш лєм наступели даскельо домашнї шпивацки ґрупи, як и госци, медзи хторима були позната шпивачка Мария Мачошкова, та шпивач українских народних писньох Петро Закамарок з Индїї, зоз Сербиї и народни фолклорно¬-танєчни колектив „Материнка“ з Камяници у Закарпаскей обласци України.
Фестивал кулминовал внєдзелю, зоз штварту програму „Барвинкова Камйонка“, у реновираним ареалу амфитеатру. Средства за реновированє обезпечен з фондох ЕУ, так же є на Фестивалє и шветочно отворени, у присустве визначних госцох з державних орґанох Словацкей, депутатох з Пряшовского самоуправного краю, делеґациї роботнїкох у култури Закарпатскей обласци України, як и делеґациї Союзу Руснацох Українцох Сербиї, на чолє з Йоакимом Грубеньом.
На програми наступели фолклорни ансамбли домашнїх, потим з Пряшова и Старей Любовнї, госци з Билорусиї, а внєдзелю тиж наступели и шпиваче Мария Мачошкова, та Петро Закамарок зоз Сербиї. Коруна Фестивалу бул наступ Поддуклянского уметнїцкого народного ансамблу (ПУЛС) з Пряшова.
