Дунай подпорни слуп и осовина

автор опс/ядю, фото вев
963 Опатрене

НОВИ САД – Нова кнїжка Михала Рамача „Дунайска рапсодия” новосадскей публики представена вчера вечар у рамикох Новосадского литературного фестивалу „Розгварки о любови (по читаню)” на Ладї „Цепелин” на Дунаю.

На барз нащивеней промоциї, на хтору пришли  велї углядни Новосадянє, госцох и автора привитал його длугорочни сотруднїк и домашнї Фестивала Дьордє Рандель на, як наглашел, културней адреси Нового Саду, дзе ше тот литературни вечар отримує уж вецей роки. На тот завод, промоция Рамачовей кнїжки була 124. културна подїя на тему розгварки о любови – любови ґу читаню, писаню и кнїжком.

О кнїжки „Дунайска рапсодия” бешедовал и видаватель кнїжки Душан Маринкович, котри наглашел же сам рукопис подзелєни до двох кнїжкох, а описує любов ґу Дунаю през филозофску, социолоґийну и историйну призму, и през теорию литератури, а друга часц кнїжки будзе обявена уж у септембру.

Алексей Кишюгас, социолоґ, спатрел рукопис зоз социолоґийного и историйного аспекту, у хторим зазначени познати и менєй познати рибаре, дзе Дунай подпорни слуп и осовина хтори вше остава, а шицко друге ше виками меня.

На промоциї читани виривки зоз кнїжки, а Рамач подзековал нащивительом, а насампредз Рандельови, же го поволал на промоцию и приблїжел кнїжку читачом.

У музичней часци промоциї наступели Оксана Марянац и Олеся Балач на гушльох, а солистка була Ана Римар Симунович.

ПОВЯЗАНИ ТЕКСТИ