ВЕРБАС – У просторийох КПД „Карпати” вчера отримани литературни вечар пошвецени дїлом академика Юлияна Тамаша. Орґанизатор програми бул предсидатель Дружтва др Деян Загорянски, а модератор Микола Шанта.
На литературним вечаре представени два твори академика Тамаша – роман на сербским язику „Дзешец любавни заповиди” и „Центурион”, а вечар обдумани як явни интервю, през хтори академика водзел Микола Шанта.
З тей нагоди Тамаш всеоблапяюцо одвитовал на питаня чому у тей хвильки живота дава предносц – науки чи литератури, яка улога литератури у нєшкайшим дружтве, цо то щесце, цо завичай, так же нащивителє мали нагоду чуц рижни интересантни факти з його биоґрафиї як науковца и писателя.
Под час програми Александра Лендєр пречитала виривки з Тамашових романох, а и сам академик пречитал єдну зоз своїх писньох. На концу програми и нащивителє поставяли питаня академикови о будуцей роботи и планох, алє и о дзепоєдних интриґантних фактох вязаних за роман „Центурион”.
