КОЦУР – Внєдзелю, 24. мая, у Доме култури у Коцуре Фолклорни ансамбл „Шинява” зоз Снїни, зоз Словацкей, отримал цаловечарши концерт. Домашнї госцом було КУД „Жатва”, чийо члени их после концерту привитали до своїх обисцох на ноцованє.
З младима танєчнїками, односно шпивачками, до Коцура пришол и предсидатель Реґионалней ради Союзу Русинох-Українцох Словацкей за обласц Гумене Михал Иванцо, хтори вєдно з руководительом Ансамблу „Шинява” Маряном Лояном, публики представел Снїну и танци хтори у Коцуре одтанцовали. На бини Дому култури привитал их член Управного одбору „Жатви” Микола Шанта, подпредсидатель Националного совиту Руснацох.
И попри нєвигодней хвилї, у сали Дому култури було надосц публики, а танєчнїки на концерту виведли танци и шпиванки з восточней Словацкей, хтори коцурска публика крашнє привитала.
Госци пред наступом нащивели коцурску грекокатолїцку церкву, Етно-клуб „Одняте од забуца”, та памятнїк коцурским борцом, а друженє домашнїх и госцох после концерту предлужене до позних ноцних годзинох.
