АНКАРА (ТУРСКА) – Пре моцни трешеня жеми у южних провинцийох Републики Турскей, у хторих настрадало на стотки людзох, преглашена национална жалосц и будзе тирвац до 12. фебруара, пренєсла Анадолия.
Ґенерална скупштина Зєдинєних нацийох зоз минуту цихосци дала почесц жертвом трешеня жеми у Турскей и Сириї.
Турски министер здравя потвердзел же погинула найменєй 1.651 особа, а 11.119 покалїчени у трешеньох жеми у Турскей.
Трешенє жеми чия моц була 7,7 ступнї Рихтеровей скали случело ше вчера на югу Турскей. Епицентер трешеня жеми реґистровани у округу Пазарчик сиверовосточно од Кахранманмарашу.
Потим ше случело нове трешенє жеми чия моц була 7,6 ступнї Рихтеровей скали на 13:24 годзин у дистрикту Елбистан, тиж у Кахранманмарашу.