Кед сце були у децембру на премиєри, лєбо у януару на репризи представи „Бал” у Руским Керестуре, вериме же ше и ви, як и ми, одушевели зоз талантованима ґлумицами, школярками шестей класи – Маю Надь, Ксению Катрина, Валентину Гарди, як и школярку осмей класи Яну Варґа. Сцели зме ше упознац з нїма, та зме их нащивели на єдней проби. Пред тим як пречитаце цо нам виприповедали принцеза, ангел, дябол и кралїца, лєм най надпомнєме же представу „Бал” написал Сашо Палєнкаш, а режирала ю Адриана Надь Барна.

МАЯ НАДЬ

Ґлумела ши уж у даєдней представи?

Мая: Вецей раз сом ґлумела у „Ступидентох”, алє сом тeраз першираз ґлумела у представи. Скорей зме з Адриану рихтали монодраму „Мая и Бобо”, медзитим, вона нє виведзена пре корону, а после сом преросла тоту улогу. На сцени сом була и кед сом водзела „Червене пупче”.   

Лєгчейше знїмац, чи ґлумиц у театру?

Мая: Лєгчейше знїмац, бо кед ше збунїм на знїманю знам же можеме ознова зняц, а у театру мушим предлужиц як кед би ше нїч нє случело.

Цо ци було найлєгчейше, а цо найчежше у тей представи?

Мая: Найчежша ми сцена зоз кралїцу, бо там компликовани текст, хтори треба одразу вигвариц. Найлєгчейше ми було винєсц першу сцену, дзе мам монолоґ. Думам же ми фино лєгла тота улога, бо принцеза ма таки становиска як и я и подобни зме. Достали зме велї похвали, цешела сом ше прето и дефинитивно останєм у театру.

Мала ши трему и чи ши ше збунєла на даєдним виводзеню?

Мая: Перше сом нє видзела кельо єст публики, лєм сом чула галайк, а кед сом вишла на сцену, барз сом мала вельку трему и тресла сом ше, алє з часом трема нєстала. Збунєла сом ше на премиєри, алє ми наша суфлерка Кристина Сопка помогла и думам же суфлер барз важна улога у каждей представи и же би без нього нє могло. Погубел ше ми и амрел кед сом го мала отвориц, нє знала сом як ше вицагнуц, алє сом вец у моменту видумала цошка цо ми перше спадло на розум и шицки ми гварели же випатрало як кед би то так требало.

Чом любиш ґлуму?

Мая: Кед ше чувствуєм подло и кед ми дзень нєфини, на проби шицко тото вируцим зоз себе. Знам же теди ґлумим, уходзим до улоги и зохабям шицко цо ше ми случує за сцену же бим на бини була цо лєпша.

ВАЛЕНТИНА ГАРДИ

Ґлумела ши уж у даєдней представи?

Валентина: Ґлумела сом и скорей, алє сом нє мала тексту. То ми перша важнєйша улога.

Цо ци було найлєгчейше, а цо найчежше у тей представи?

Валентина: Барз ми ше пачело ґлумиц. Було ми лєгко войсц до улоги, бо є подобна мойому характеру. Найчежше ми було же ше цали час мам задзерац до ангела и правиц шицки тоти ґримаси.  

Мала ши трему и чи ши ше збунєла на даєдним виводзеню?

Валентина: Перше сом ше злєкла же цо кед ше збунїм пред телїма людзми, а вец сом патрела на слики на мурох у сали, та сом ше змирела и забула сом на трему. Думам же сом нє погришела, наздавам ше. Дзеци у школи после премиєри кричали – пать дябол и ангел, та нам було мило же нас препознали.

Чом любиш ґлуму?

Валентина: Бо ма вельо предносци. На пробох ше забавяме, щири зме медзи собу, нє маме тайни и вше зме на ти, як єдна фамелия. Любела бим и далєй ґлумиц.

Яки маш ище гобиї?

Валентина: Єден з моїх гобийох то и рисованє и мальованє. Участовала сом и на єдней подобовей колониї. Дакеди рисуєм портрети, дакеди природу, завиши як сом розположена. Любим и читац кнїжки. Под час корони, кед ми було допито, мац ми предложела же бизме ше уписали до библиотеки и теди сом почала читац и то ше ми барз попачело.  

КСЕНИЯ КАТРИНА

Ґлумела ши уж у даєдней представи?

Ксения: Як менша сом ґлумела зоз учительку, алє ми тераз була, най так повем, перша права улога.

Цо ци було найлєгчейше, а цо найчежше у тей представи?

Ксения: Ґлумела сом ангела и лєгко ми було войсц до тей улоги. Часто зме мали проби, алє ми то нє було напарте, а нє було чежко анї научиц тельо тексту. Подцаговала сом себе мой текст, читала, читала и єдноставно ми вошол до глави. Ґлума нє за каждого, алє кажде може пробовац, можебуц ма скрити талант. Наздавам ше же и далєй будзем у театру.

Мала ши трему?

Ксения: Кед сом вишла на бину, барз ми ше рука тресла, мала сом трему, алє ми гварели же то нє було видно. Алє, щиро, було зато страшно.

Яки маш ище гобиї?

Ксения: Ходзим до музичней школи на гармонику, ходзим на фолклор, а учим грац и на ґитари, так, пре себе. У шлєбодним чаше помагам родичом по обисцу, дружим ше з пайташками.

ЯНА ВАРҐА

Ґлумела ши уж у даєдней представи?

Яна: Ґлумела сом ище у двох представох, алє наратора, тераз сом першираз мала векшу улогу. Участвовала сом и у виробку сценоґрафиї.

Цо ци було найлєгчейше, а цо найчежше у тей представи?

Яна: Спочатку нє було так лєгко, бо сом нїґда нє ґлумела мацер. Лєгко ми було бешедно, бо ми ту вельо помогло рецитованє, пре дикцию, та сом знала як виповесц мой текст, хтори досц озбильни.

Мала ши трему?

Яна: Нє було ми страшне висц пред тельо людзох, бо сом ше ище давно упознала зоз трему и знам яке то чувство.

Чом любиш ґлуму?

Яна: Прето же враца до дзецинства, бавиш ше док ґлумиш. Шицки нєшка таки озбильни, шицки сцу вироснуц, а кед придзем ту, як дзеци зме. Барз бим любела остац у театру и любела бим висц зоз дзецинских представох и достац даяку озбильнєйшу улогу.

Яки маш ище гобиї? 

Яна: Ходзим на фолклор, шпивам зоз шпивацку ґрупу, ходзим до музичней школи на тамбурку, рецитуєм, рисуєм, илуструєм праве за „Заградку”. Шицко любим, а тераз ми приоритет рисованє, бо плануєм уписац ґрафични дизайн. У шлєбодним чаше, медзи иншим, любим слухац подкасти, а музику слухам рижнородну, алє найволїм старши панк бенди.