КУЛА – Вчера у Кули шветочно положени фундаментни камень за вибудов тарґовинского центру под назву „Nova RetailPark Kula“, на чиєй поверхносци од пейц гектари будзе вибудоване вкупно 15.500 квадратни метери комерцийного простору.
Фундаментни камень положели министер будовательства, транспорту и инфраструктури Ґоран Весич, инвеститор Марко Ґруїчич и предсидатель Општини Кули Дамян Милянич.
Министер Весич на тот завод, медзи иншим, гварел же тот тарґовински центер понукнє 300 роботни места и же ше Кула найдзе на єдней швидкей драги, такволаней „Ошмих Войводини”, хтору би требало почац будовац по конєц рока, а хтора почина при Бачкому Брегу, потим идзе прейґ Зомбору, Кули, Вербасу, Србобрану, обидвох Бечейох, Кикинди и на концу Сербскей Црнї.
Попри супермаркетох, модних брендох и технїки, „Nova Retail Park Kula“ понукнє и провадзаци змисти, ресторани, кафичи и дзецински бавялнї. Под час будовательней фази буду заняти 300 роботнїки, а по законченю вибудови будзе заняте даскельо стотки людзох, гварене на отвераню.
