РУСКИ КЕРЕСТУР – У керестурскей парохиї св. оца Миколая вчера преславена Вилїя, а нєшка Перши дзень Крачуна по григориянским календаре.
Крачунске всеночне на 23 годзин у Катедралней церкви предводзел апостолски еґзарх за грекокатолїкох у Сербиї, владика Георгий Джуджар, а сослужовали 10 священїки з нашого Еґзархату.
Уж од пополадню дзеци ходзели по шпиваню по обисцох родзинох и приятельох, вечар и млади, а як кажди рок, було надосц шпивачох и з других местох, но перши упечаток же их було мєнєй як скорейши роки.
Нєшка, на Перши дзень Крачуна, на 10 годзин будзе Архиєрейска Служба Божа, котру будзе предводзиц владика Георгий, а Службу будзе шпивац керестурски Мишани хор Дому култури и Катедралней церкви св. о. Миколая.
