РУСКИ КЕРЕСТУР – У преполней сали керестурского Дому култури, вчера вечар отримани успишни Крачунски концерт, на хторим присуствовал и преосвящени владика Георгий Джуджар и шицким повинчовал крачунски швета, здогадуюци и на значенє и важносц Христового народзеня. Тиж так, владика повинчовал и наиходзаци Нови рок.
Найрадоснєйше християнске швето возвеличане з колядами, хтори виведли Дзецински хор „Шкорванчки” Дому култури, Хор школярох осмих класох Школи „Петро Кузмяк”, Мали оркестер кулскей ШОМО, Дзивоцка, та Мишана шпивацка ґрупа и Мишани хор Дому култури, а шпивачох провадзел Тамбурови оркестер тей установи.
Крачунски винчованки рецитовали Минеа Югас и Тимеа Будински, а виронаучни школяре виведли драмску сличку „Крачунска представа”. На концу шицки учашнїки и публика вєдно одшпивали коляду „Пречистая Дїва”.
Орґанизатор Крачунского концерту Дом култури Руски Керестур, шпивачох и оркестри пририхтали Лидия Пашо, Юлиян Рамач Чамо и Мирон Сивч, рецитаторки Ивана Дудаш, виронаучни дзеци чесни шестри служебнїци, конферансу зложела Мария Стрибер, а водзела ю Лидия Костелник.
