КОЦУР – Перша провадзаца програма у рамикох тогорочней Културней манифестациї „Коцурска жатва” и стретнуца младих у Коцуре отримана вчера, 18. юлия, у Етно клубу „Одняте од забуца”.
У предполадньових годзинох предсидателька КУД „Жатва” Мелания Мали привитала наймладших на роботнї котру пририхтал и водзел Марко Буила. На таки способ уж пияти рок почина тота манифестация. Як гварел Буила, и того року ше намагали же би роботня була повязана зоз руску традицию и културу, та тема була вязана за дзивоцку ладу.
Дзеци мали нагоду пообиходзиц и музей, а предсидателька Етно клубу Аранка Медєши им потолковала цо то дзивоцка лада, як вона випатрала, як була украшена и цо ше шицко у нєй находзело. Роботня мала и свою подобову часц, та наймладши мальовали и на свой способ прикрашели дзешец мали, з древа направени, дзивоцки лади котри подаровал столар зоз Коцура, а котри буду виложени под час манифестациї у Доме култури.
Роботня за дзеци отримана як увод и перша часц єдней з провадзацих програмох тогорочней ювилейней Културней манифестациї у Коцуре.
