РУСКИ КЕРЕСТУР – З нагоди 9. „Поетских нїткох Меланиї Павлович”, у керестурским Замку вчера отримана пригодна школска програма, на хторей у мено орґанизатора – керестурскей Секциї Дружтва за руски язик, литературу и културу, присутних привитала єй секретарка Мария Доршки, а на творчосц Меланиї Павлович здогадли заступнїк Дружтва Ирина Папуґа и поетеса Гелена Гафич Стойков зоз своїма стихами.
Стихи и драмску сличку Павловичовей, як и поезию Серафини Макаї, презентовали школяре штвартей класи керестурскей ОШ „Петро Кузмяк”, а потим шицки школяре тей класи и їх учительки Любица Бучко и Ясмина Сабадош достали и Припознаня од Дружтва.
Припознаня як найвреднєйши читателє керестурскей Библиотеки достали Матеа Югик и Алексей Роман з першей класи, Милица Илич з другей класи и Яким Винаї – новинар з Руского Керестура.
Припознаня як найвреднєйши читаче школскей библиотеки достали по двойо школяре од трецей по осму класу – Мая Сопка и Анамария Малацко, Лана Кнежевич и Павле Гербут, София Семан и Боян Вилянац, Александар Киш и Виктория Шайтош, Лазар Дьордєвич и Ивана Планчак, Кристина Катона и Себастиян Надь, як и школярки першей и штрвартей класи руского оддзелєня Ґимназиї Кристина Гайдук и Милица Новакович.
