РУСКИ КЕРЕСТУР/ПЕТРОВЕЦ НА МЛАВИ – Ансамбл Дому култури Руски Керестур всоботу 17. октобра, бул медзи 26 вибранима танєчнима ґрупами, жридловима шпивацкима ґрупами, дуетами и солистами на стародавних инструментох, хтори участвовали на 43. Соборе народней творчосци Сербиї у Петровцу на Млави.
На найвисши фестивал у тей обласци у держави Керестурци ше пласовали после участвованя на 37. Фестивалє фолклорних традицийох Войводини (отримани концом прешлого мешаца у Вербаше) з танцом „Вербунґ на Горнїци” Танєчней ґрупи ветеранох, у хореоґрафиї Ґабриєли Саянкович. У танєчней точки участвує и Хлопска шпивацка ґрупа и Тамбурови оркестер Дому култури, под руководительством Юлияна Рамача Чаму.
Попри Керестурцох, Войводину на Соборе представяли ище штири ґрупи – Фолклорна ґрупа КУД „Србия” з Кули з приказом танцох з Бачкей, хтору пририхтал Жарко Пейович; Женска шпивацка ґрупа „Личко оґнїште” КУД „Приґревица” з Приґревици, Женска шпивацка ґрупа КУД „Бранко Радичевич” зоз Старей Пазови и ґайдаш Зоран Белянски зоз Стапару. За участвованє на Соборе вибрала их селекторка Фестивалу у Вербаше, хореоґрафка Слободанка Рац з Бачкей Тополї.
Собор народней творчосци Сербиї отримани на отвореним – на площи у центре Петровцу на Млави, а у орґанизациї Союзу аматерох Сербиї и Културно-просвитного центру з того места. Покровителє манифестациї була Општина Петровец на Млави.
