БИКИЧ – Зоз пригодну програму хтора отримана у Доме култури всоботу, 17.януара у орґанизацї КПД „Иван Котляревски“ означене националне швето Руснацох.
После державней гимни „Боже правде“ и шветочней шпиванки Руснацох „Браца Русини“ присутних спред орґанизатора привитал предсидатель КПД „Иван Котляревски“ Деян Бобаль.
У програми здогаднуте на историйни хвильки присельованя Руснацох на тоти простори окреме же Руснаци до Бикичу пришли з околїска Бардейова и же и нєшка отримую вязи зоз старим крайом.
Тиж начишлєни шицки значнєйши подїї вязани за живот Руснацох у валалє хтори оможлївели же би ше затримало свой идентитет по нєшка прейґ церкви, школи и култури.
У уметнїцкей часци програми наступела Дзецинска шпивацка ґрупа дружтва зоз колядами и народнима шпиванками, уметнїцка руководителька Любов Зейкан Бобаль, а на гармоники их провадзел Мирослав Майхер.
Невенка Бобаль пречитала свою писню „Руска мац“, а Зденко Лазор писню Владимира Кочиша „Кед облапяме и любиме оцец и я“.
После програми отримани коктел и друженє, а госцох було и зоз Шиду, Беркасова и Бачинцох.
