РУСКИ КЕРЕСТУР – Вчера вечар у Руским Керестуре отримана Централна програма Двацец другей Културней манифестациї „Костельникова єшень” (КМ КЄ) на хторей у присустве авторох и рецензентки представени два нашо нови кнїжки – збирка поезиї Агнети Бучко Папгаргаї „Осце и черешнї” и збирка критикох, оглядох и есейох Ирини Гарди Ковачевич „Галов”, а госци литературно-музичного вечару були академик Юлиян Тамаш и познати сербски писатель Светислав Басара.
Модератор програми бул предсидатель Орґанизацийного одбору КМ КЄ Микола Шанта, а у приємним амбиєнту керестурского Ресторану „Червена ружа” пририхтаним за тоту нагоду, академик Юлиян Тамаш на початку по руски и по сербски пречитал упечатлїву бешеду о Богови, язику и кнїжки.
О спомнутих кнїжкох двох наших доказаних авторкох бешедовала рецензентка виданьох Олена Планчак Сакач, котра за седму кнїжку, а шесту нову збирку поезиї Агнети Бучко Папгаргаї, визначела же то кнїжка поезиї болю и смутку, з найкрасшима стихами о старосци у рускей литератури. Авторка на програми и сама пречитала єдну писню зоз збирки „Осце и черешнї”.
Рецензентка похвално оценєла и у нашей литератури нє часте виданє критикох, оглядох и есейох – „Галов” Ирини Гарди Ковачевич, визначуюци же є барз хасновити ориєнтир за руску литературу. Попри о писательох и їх творох рижних ґенерацийох, Гарди Ковачевичова у кнїжки дава и свойо думанє о културних и других збуваньох, та як гварела авторка, то на одредзени способ и „литературно-културна история єдного часу”.
– „Галов” то творча литературна критика, и попри критикох Юлияна Тамаша и Дюру Папгаргая, забера високе место у нашей литератури. Спада ґу успишнєйшим виданьом НВУ „Руске слово” – гварела Олена Планчак Сакач.
Проф. др Стеван Константинович вчера мал задаток кратше представиц богати литературни опус госца програми Светислава Басару, цо, як гварел, анї кус нє лєгко, бо анї библиоґрафе, та аж анї сам автор, цо вон и потвердзел, нє знаю кельо ма обявени кнїжки и други библиоґрафски єдинки. Поведзене же то прейґ 30.
Читаюци дзепоєдни виривки з його дїлох, Константинович найвецей бешедовал о Басаровим, можебуц першим значнєйшим роману „Фама о бициґлистох”, обявеним 1988. року, хтори, по його думаню, предходнїца шицких познєйших шветово популарних романох о рижних тайомних дружтвох.
Басара у своїх белетристичних роботох, есейох и колумнох, як поведзене – насампредз з ґротеску демистификує вельки познати и национални мити, державни орґани, „високу политику”, тайомни дружтва, алє и предвидзує збуваня.
Светислав Басара кратко и концизно одвитовал и на дзепоєдни питаня модература и з публики о терашнєй дружтвеней ситуациї, улоги литератури и писателя, улоги и уплїву поєдинца на терашнї дружтвени девияциї, а бешедоване и о присутносци литературох меншинох, конкретно рускей, у сербскей и шветовей литератури. Госц посовитовал же би ше ю прекладало бо, як гварел – „драги и дзвери вам нє заварти, лєм их нє заверайце сами”.
Вчерайши интересантни вечар збогацели нашо познати музичаре – шпивачка Мирослава Даждиу и Мирослав Пап, котри ю провадзел на ґитари. Мирослава Даждиу и на тот завод потвердзела же є одлична шоивачка, тераз з интерпретацию штирох старих руских народних шпиванкох, а у новим, модернєйшим аранжману Мирослава Папа – „Чийо же то конї”, „Мамо моя, мамо”, „Лучка, лучка” и „Бимбора, бимбора”.
