КОЦУР – У рамикох тогорочней Културней манифестациї „Костельникова єшень” у коцурскей Основней школи „Братство-єдинство” вчера отримана литературна програма, на хторей ше школяром представела поетеса Ксения Лїкар з Миклошевцох, з Горватскей, а зоз школярами бешедовали и писателє Мелания Римар, котра и редакторка „Заградки”, и Микола Шанта, одвичательни редактор Видавательного оддзелєня „Руского слова”.
Госцох привитала наставнїца руского язика Снежана Шанта, а Микола Шанта школяром бешедовал о Гавриїлови Костельникови. Ксения Лїкар, чия збирка писньох за дзеци будзе видата нарок, школяром пречитала даскельо писнї з будуцей кнїжки, а бешедовал и о тим як почала писац за дзеци.
Редакторка „Заградка” Мелания Римар з дзецми бешедовала о писаню до „Заградки”, а наявела и роботню за дзеци о писаню писньох. З пригодну шпиванку, на програми участвовала шпивачка Танита Ходак.
Програму провадзели школяре руских оддзелєньох од першей по штварту класу котри крашнє привитали уж им познатих Шанту и Римарову, алє и їм нову госцинску Ксению Лїкарову, та поставяли питаня и инерактивно участвовали у програми.
