29. АПРИЛ – На нєшкайши дзень народзел ше Дюра Сопка, перши новинар и редактор емисийох на руским язику у Радио Новим Садзе.
1920 – Народзел ше Дюра Сопка (Петровци, 29. април 1920 – Нови Сад, 10. май 1982) бул перши радио новинар и редактор емисийох на руским язику у Радио Новим Садзе. До основней школи ходзел у Петровцох и у Дюрдьове, уписал ше до класичней ґимназиї у Заґребе. По Другей шветовей войни єден час робел у землєдїлскей задруґи у Дюрдьове, а од 1949. року робел як новинар у Редакциї „Руского слова”, а вец як редактор руских емисийох у Радио Новим Садзе (од 1949 по 1955). Закончел Висшу педаґоґийну школу у Новим Садзе, дипломовал на ґрупи французки язик и литература на Филозофским факултету. Робел як просвитни роботнїк и директор Основней школи у Руским Керестуре, потим у Савиним Селу и вец у Дюрдьове. Року 1962. бул совитнїк за школи зоз руским наставним язиком у Просвитно-педаґоґийним заводу АПВ, а од 1970. року у Покраїнским секретарияту за информациї.
1999 – У воздушних вдереньох НАТО-а на СРЮ звалєна телекомуникацийна турня на Авали. Турня була збудована 1965. року и обновена є у априлу 2010. року.
Шветови дзень танца установел Медзинародни совит за танєц 1982. року.
Шветови дзень псох водзачох (International Guide Dog Day) означує ше остатнєй стреди у априлу же би ше визначело значносц тих псох у живоце цемней и слабовидей особи. Запровадзела го 26. априла 1989. року Медзинародна федерация здруженя псох водзачох.