РУСКИ КЕРЕСТУР – Музични албум Златка Русковския з Руского Керестура „Лєм єден погляд” вчера, перши дзень 18. Мултимедиялней манифестациї младих „Дньовка”, представени пред полну Билу („Дядьову”) салу з нащивителями у Доме култури, хтора за тоту нагоду була аж и мала.
Як и на албуме, и на тим мини-концерту Златково композициї одшпивали Анамария Колошняї, Саня Полдуги и Танита Ходак, а провадзели их музичаре – сам автор Златко Русковски на бас ґитари, Владимир Медєши на ґитари, Сашо Палєнкаш на кахуну и Мирко Преґун на клавиятури.
Вони виведли шицки 12 забавни шпиванки по руски зоз спомнутого албуму, хтори вишол з остатнїм числом часопису МАК, a публика их потримовала и на концу наградзела з енерґичним аплаузом.
