НОВИ САД – У Заводу за културу войводянских Руснацох (Матици сербскей 15, Нови Сад), стреду, 10. юния отримани два схадзки Управного одбору Заводу. Перша була конститутивна, а друга схадзка була перша у новим зволаню.
Нови Управни одбор (УО) Заводу за културу войводянских Руснацох (ЗКВР) ма пейц членох, а то предсидателька Мартица Тамаш и члени: Мирон Джуня, Биляна Ковачевич, Сенка Мученски и Михайло Киш. Одсуство оправдала Сенка Мученски.
На конститутивней схадзки були два точки на дньовим шоре, та верификовани Ришеня членох и конституовани Управни одбор ЗКВР, тиж членом УО суґероване най цо скорей пополня прияви маєтку Аґенциї за борбу процив корупциї.
Такой отримана и перша схадзка у новим зволаню УО ЗКВР за хтору предложени седем точки дньового шору. Аня Рац предложела же би ше на дньови шор додало ище єдну точку: прилапйованє ришеня о надополнєню чкоди за рочни одпочивок, понеже дотерашнї директор ЗКВР Сашо Сабадош ма право на надополнєнє за нєвихасновани днї рочного одпочивку, цо єдногласно прилапене. Прилапене розришенє и принєшене ришенє о претаргованю роботного одношеня зоз Сашом Сабадошом, хтори 3. юния розришени длужносци директора ЗКВР. Сабадош з тей нагоди пожадал новоменованей в.д. директора Ренати Вуясинович успих у роботи и понукнул помоц у реализованю Плану роботи хтори уж принєшени. Єдногласно прилапене и Ришенє о менованю в.д. директора Ренати Вуясинович зоз хтору и заключени Контракт о роботи. За заменїка предсидателя УО ЗКВР вибрана Биляна Ковачевич, а на схадзки прилапени План набавки на хтори ше закон нє применює за 2026. рок и принєшени Правилнїк о поступку нукашнього збуньованя.
