КОЦУР – У просторийох подручней канцелариї Националного совиту рускей националней меншини, всоботу вечар, 19. септембра, отримани литературни вечар у орґанизациї Литературней секциї КУД Жатва.
Вечар бул пошвецени представяню найновшого романа Звонка Сабола Пируета у виданю новосадского Прометея. З тей нагоди о роману бешедовали рецензентка Ирина Гарди Ковачевич, Мария Горняк и Микола Шанта, а о кнїжки бешедовал и сам автор Звонко Сабо.
У самим роману описана судьба людзох у рижних правних и обичайних системох, а по Шантових словох, видно же автор ма вельке искуство зоз людскима судьбами як длугорочни судия и адвокат и очиглядно же добре позна таки животни обставини. То други роман зоз сериї дзе у позадини одредзени правни случаї зоз хторима ше Сабол очиглядно стретал.
То перша промоция нового, другого по шоре, Саболового романа, котру одлучел отримац у своїм родним месце.
Шицки присутни достали и безплатни прикладнїк романа, а у приємней атмосфери предлужене друженє и бешеда о литератури.
