РУСКИ КЕРЕСТУР – Трицец пейц екипи позберали ше внєдзелю, 20. септембра, у часци беґелю од брани ґу Крущичу, на другим змаганю торогочней Чукияди „Йожеф Кишˮ, хтора ше отримує у рамикох Асоцияциї Чукияди. Здруженє спортских рибарох „Коляк” по пияти раз було домашнє тому змаганю, а пенєжни награди додзелєни першим штиром найлєпшим екипом.
Найуспишнєйша була екипа „Вепровачˮ зоз Крущичу, хтора по перше место сцигла зоз трома влапенима рибами, a хтори вкупно мали 3.350 ґрами. Друге место припадло екипи „Нови каналˮ зоз Вербасу, зоз двома рибами хтори мали вкупну чежину 1.705 ґрами, док треце место освоєла екипа „Кулатрансˮ зоз Крущичу, тиж зоз влапенима двома рибами, а вкупней чежини 1.395 ґрами. На штвартим месце закончела домашня екипа „Маратонци са селаˮ зоз Савиного Селa, чийо члени влапели два риби хтори мали 1.250 ґрами.
Главни судия бул Дарко Чернок, а помоцни судийове були – Михайло Костелник, Ярослав Гарди, Михайло Пашо и Михайло Чернок.
Чукияда „Йожеф Кишˮ и того року ма карактер серийох змаганя, та ше после Деспотова, дзе 13. септембра отримане перше змаганє, и Руского Керестура, змаганя предлужую того викенду у Вербаше.