КИКИНДА – Тогорочна 41. по шоре манифестация „Днї лудаї” у Кикинди закончена внєдзелю, 20. септембра, а перши змисти почали уж штварток, 17. септембра.
Числени подїї отримани през штири днї тирваня манифестациї, та нащивителє мали нагоду уживац у Госцинскей хижи Европи у котрей вецей културно-уметнїцки дружтва приказали свою програму, у Банатским фруштуку дзе могли покоштовац специялитети котри представели числени здруженя зоз Сербиї и иножемства, у Европским куцику, бависками з лудаю, трафяню глїняних голубох, подобових виставох, спортских бавискох, и велїх других активносцох.
И того року Улїчка старих ремеслох и сувенирох була окреме богата и нащивена, а зоз своїм змистом врацела нащивительох до старших часох. Богати бул и Саям поднїмательох на котрим було вецей як 60 викладательох, а медзи нїма и Силвестер Русковски зоз Коцура котри представел палєнку зоз бундави, ликер зоз ягоди, ликер и палєнку зоз смокви и числени други домашнї продукти.
Кажди вечар под час манифестациї госци уживали у наступох познатих шпивачох на городскей площи, а публику забавяли ґрупа Леґенди, Ґоца Тржан, Драґана Миркович и ґрупа Концертмайстрове.
Меранє найчежшей и найдлугшей лудаї и преглашенє побиднїкох була централна подїя самей манифестациї. Тогорочни шампиони були Тибор Кокаи зоз Мадярскей чия бундава по шести раз освоєла титулу найчежшей зоз 559 килограми, и Душан Янков зоз Чуруґу котри освоєл награду за найдлугшу тикву длугоку 275 центиметри.
Минифестацию каждого року нащивює вецей дзешатки тисячи госцох зоз жеми и иножемства, а так було и того року.