ЖАБЕЛЬ – По нєдзелю, 27. септембер, будзе отворена Манифестация „Дзецински Сафари”. Отримує ше у будинку Општини Жабель, у биоскопскей сали. У єдней часци сали виложени вецей препарирани дзиви животинї у своєй природней велькосци, а у биоскопскей сали ше отримую културни, уметнїцки и едукативни роботнї за дзеци.
Так нєшка, штварток 24. септембра од 19 годзин будзе роботня „Кнїжовна експедиция през Африку”, а наютре пияток, 25. септембра од 19 годзин, аниматоре буду забавяц дзеци зоз юнаками зоз рисованих филмох, медзи нїма Мики, Мини и Лєв. На соботу, 26. септембра од 15 годзин и од 17 годзин будзе виртуална активация, упознаванє Африки през виртуални окуляри, а од 16 годзин будзе роботня „Животинї Африки” котру орґанизує Природняцки центер Свилайнац. Остатня активносц того дня будзе роботня „Сафари одцисок” у орґанизациї Природняцкого центеру Свилайнац. Остатнї дзень манифестациї, на нєдзелю, 27. септембра од 15 и од 17 годзин будзе ознова виртуална активация и упознаванє Африки през виртуални окуляри, од 16 годзин роботня „Сафари опрема” и од 18 годзин роботня „Африцки валал”, обидва орґанизує Природняцки центер Свилайнац.
Манифестацию „Дзецински Сафари” у Жаблю, мож нащивиц кажди роботни дзень од 14.30 по 19 годзин, а предполадньом ю, од 9 по 14.30 годзин, можу нащивиц орґанизовани ґрупи дзецох зоз школох и предшколских установох. Соботу и нєдзелю будзе отворена за шицких нащивительох од 14.30 по 19 годзин.
Уходнїцу ше нє наплацує, алє кажде треба же би на уходзе на манифестацию донирал школски прибор по своєй дзеки, як цо наприклад тека, клайбас, крейдочки и подобне. Донирани школски прибор будзе дати дзецом котрим то найпотребнєйше.
Орґанизаторе манифестациї Туристична орґанизация Општини Жабель и Општинска народна библиотека „Велько Петрович”.