ЖАБЕЛЬ – Схадзка Скупштини општини Жабель, XVII у актуалним зволаню, отримана пияток, 25. септембра. Пред одборнїками бул дньови шор зоз пейцома точками, нє були поставени одборнїцки питаня, а схадзка тирвала менєй як пейц минути. На схадзки були присутни петнацецеро одборнїки, а шицки точки дньового шора єдногласно прилапени.
Перша точка дньового шора була приношенє Рочней програми защити, ушореня и хаснованя польопривредней жеми у општини Жабель у 2026. року на хтору достати позитивни думаня од Министерства польопривреди, лєсарства и водопривреди – Управи за польопривреду, општинскей Комисиї за даванє думаня о Предкладу спомутого рочного плану и Комисиї за виробок того плану.
Друга точка була приношенє Ришеня о даваню согласносци на штварту вименку Програми дїлованя Явного комуналного подприємства „Водовод општини Жабель” за 2026. рок и друга вименка Окремней програми хаснованя субвенцийох з буджета Општини Жабель за 2026. року, зоз котру вигласани план виробку проєкта у пошореню за преробок води у Ґосподїнцох, вредносци 15 милиони динари без порциї.
Треца точка дньового була приношенє Ришеня о даваню согласноци на финансийни звит Явного комуналного подприємства „Чистота” Жабель за 2025. рок, а вигласане Ришенє о даваню согласносци на Одлуку Надпатраюцого одбору ЯКП „Чистота” Жабель о розподзельованю заробку у 2025. року, односно же ше розподзелї добит у суми 18.638.317,48 динари, котри витворени у прешлим року, дзешец одсто ше уплаци сновательови, односно општини Жабель, а остаток остава подприємству як нєрозподзелєна добит. Остатня точка днього шора була Упознаванє зоз вименку Рочного плану роботи Општини Жабель у 2026. року, после чого требали ушлїдзиц одборнїцки питаня, алє их и на тот завод, подобно як и на прешлих схадзкох, нє було.
