По остатнїм Попису жительства зоз 2022. року, Руснацох у Сербиї єст 11.483, док до Окремного виберацкого списку у хвильки кед ше розписовало виберанки за национални совити у септембру того року Руснацох було уписано 6.618 гласачох. Велька розлика у тих двох цифрох така прето же до ОВС уписани лєм полнолїтни гражданє, и то виключно на власну вимогу. Значи хто ше нє пошол уписац сам ґу компетентним службом, остава без права гласа у тим случаю. На Попису жительства 2011. року, Руснацох у Сербиї було 14.246, зоз чого мож заключиц же за єденац роки нас було менєй скоро 20 одсто.
Виберанки за Национални совит рускей националней меншини нагода же би вибераче розпатрели же хто у наступних штирох рокох будзе представяц руску заєднїцу, алє и же би ше розпатрело же хто ше ма старац о руским язику, култури, образованю и информованю.
Национални совит ма окремне место у институцийним живоце меншинскей заєднїци, його инґеренциї ясно утвердзени зоз законами. Тота институция задлужена за витворйованє правох припаднїкох меншинох, за порушованє инициятивох, и заступанє интересох заєднїци пред висшима орґанами.
Руснацом то нє лєм формални компетенциї, вони ше насампредз одноша на давно здобути и зоз Уставом и законами заґарантовани права, котри нє лєм же потребне очувац, алє и унапредзиц. То ше одноши на можлївосц образованя на мацеринским язику на шицких уровньох, очуванє шицких руских културних установох, институцийох, и дружтвох, потим очуванє и унапредзованє обласци службеного хаснованя язика и писма, у шицких сеґментох, алє и информованя на руским язику. То тото цо нам заґарантоване, тото цо зме нашлїдзели од наших предкох, а котре треба же бизме придали нашим потомком, ище лєпше, сучаснєйше, праве таке з яким укажеме же ше хтошка о тим старал зоз подполну националну свидомосцу. Бо, хто ше будзе старац о нас Руснацох, кед нє ми сами.
Виберанки за нове зволанє Националного совиту рускей националней меншини буду отримани 8. новембра, потим, на основи резултатох, гласи буду пропорцийно розподзелєни на 19 мандати членох, кельо ма НСРНМ, и пред новим зволаньом останю исти задатки зоз новима виволанями.
