БЕОҐРАД – Одкупну цену жита ше на тарґовищу шлєбодно формує и держава на ню нє може дїйствовац, гварела министерка польопривреди и животного штредку Снежана Боґосавлєвич Бошкович на вчерайшей схадзки з представителями польопривреднїкох, одкупйовачох и других котри робя зоз житом.
Понеже терашня одкупна цена жита барз нєвигодна за продуковательох, министерка гварела же за лаґерованє жита польопривреднїки годни закупиц явни маґазини и чекац одвитуюцу цену.
– Тот рок характеристични по вельких и рекордних урожайох у Сербиї и сушедних жемох – гварела министерка Боґосавлєвич Бошкович и наявела же идуцого мешаца будзе обявени правилнїк о квалитету жита, муки и кондиторских продуктох, хтори допринєше лєпшим ценом на тарґовищу.
На схадзки бул и министер тарґовини Расим Ляїч, котри наявел частейши инспекцийни, порцийни и финансийни контроли при плаценю ПДВ-а у одкупйованю жита и реґуларне змаганє на тарґовищу.