РУСКИ КЕРЕСТУР – У орґанизациї керестурского Конїцкого клубу „Русин”, другого дня Манифестациї „Днї керестурскей паприґи”, 14. авґуста, на Гиподроме „Леї” отримани дринґацки коньски обегованя.
Програма отворена з дефилеом парадних запрагох членох домашнього Клубу и госцох з Коцура, Червинки и Крущичу, а парадни запраги вожели и дзеци.
Предсидатель КК „Русин” Желько Папуґа з тей нагоди ветераном и учашнїком у дефилеу – Якимови Чизмарови, Владови Медєшови и Янкови Планчакови уручел погари за доприношенє конїцкому спорту у Руским Керестуре, а припознанє достал и Ґабор Медєши.
У штирох єднозапрагних дринґацких обегованьох участвовали конї власнїкох з вецей войводянских местох и з Нишу, а у двох обегованьох участвовал и домашнї змагатель – Янко Планчак, у єднозапрагним и у ревиялним двозапрагним дринґацким обегованю дзе освоєл треце место.
Орґанизатор прейґ спонзорох обезпечел пенєжни награди за перши штири завжати места, а побиднїкови у каждим обегованю додзелєни и погар хтори у ревиялним обегованю додзелєл предсидатель Конїцкого союзу Сербиї за парадни запраги и орґанизацию змаганьох Вєкослав Пападоколо.
Домашнї конїцки клуб медзи обегованями орґанизовал и богату забавну програму за публику як цо змаганє за старших у нацагованю штранґа, а за дзеци обегованє у мехох и окреме атрактивне бависко „Влап награду” дзе дзеци оганяли заяца, а у другим бависку вєдно зоз старшима требало влапиц праше.
На керестурских Лейох було вельо публики и любительох коньох, и то нє лєм з Керестура и околїска, алє и з велїх войводянских местох.
За шицких орґанизатор пририхтал и єдзенє у двох котлох, Здруженє женох „Байка” предавало колачи, а зоз своїм штандом було и Здруженє паприґарох „Капсикум анум”, а друженє под шатром и зоз гудацами потирвало до позней ноци.